وەزارەتی نەوتی عێراق بڵاوی كردەوە، ئەو گرێبەستەی نەوت و وزەی حكومەتی هەرێم كردوویەتی ڕەتی دەكەینەوە و دژی یاساكانی حكومەتی عێراقی فیدراڵە، كە دەڵێت، سامانە سروشتییەكانی خاكی عێراق وەكو نەوت موڵكی هەموو تاكێكی عێراقە، پێویست بوو حكومەتی هەرێم پێش گرێبەستەكە گفتوگۆ لەگەڵ حكومەتی فیدراڵ بكردایە.

وەزارەتی نەوتی عێراق سەبارەت بەو ڕێككەوتنە نوێیەی مەسرور بارزانی سەرۆكی كاربەڕێكەری حكومەتی هەرێم تایبەت بە وزەی سنووری سلێمانی لە ئەمریكا كردووەیەتی، ڕاگەیاندراوێكی بڵاوكردەوە.

لە ڕاگەیاندراوەكەدا هاتووە، هەندێك لە ماڵپەڕە هەواڵییەكان ئاماژەیان بەوەكردووە، كە حكومەتی هەرێمی كوردستان ڕێككەوتنێكی نوێی لە بواری وزە بە بەهای دەیان ملیار دۆلار، لە كێڵگەی میران و كێڵگەی تۆپخانە-كوردەمیر لە پارێزگای سلێمانی لەگەڵ ئەمریكا ئەنجامداوە.

ئاماژە بەوەشكراوە، ئەم ڕێككەوتنە پێشێلكردنی ئەو بڕیارانەیە، كە لەلایەن دادگای فیدراڵییەوە دەرچووە، كە ئاماژەی بە نایاساییبوونی ئەو گرێبەستانە كردووە.

دەشڵێن: سەرەڕای پێویستی عێراق بۆ زۆرترین وەبەرهێنانی غاز و دابینكردنی خواستی ناوخۆیی بۆ وێستگەكانی بەرهەمهێنانی كارەبا، ئەو ڕێوشوێنانەی حكومەتی هەرێم گرتوویەتییەبەر پێشێلكارییەكی ڕوونی یاسای عێراقە.

ئەوەش خراوەتەڕوو، سامانی نەوت هی هەموو عێراقییەكانە و هەر وەبەرهێنانێك لەم سامانەدا دەبێت لە ڕێگەی حكومەتی فیدراڵییەوە ئەنجام بدرێت، بۆیە وەزارەتەكەمان بە پشتبەستن بە دەستووری عێراق و بڕیارەكانی دادگای فیدراڵی پووچەڵبوونەوەی ئەو گرێبەستانە دووپات دەكاتەوە.

جێگای ئاماژەیە، دوێنێ مەسرور بارزانی سەرۆكی كاربەڕێكەری حكومەتی هەرێم بە سەرۆكایەتی شاندێك گەیشتە ئەمریكا و ئەمڕۆ گرێبەستێكی بە بەهای دەیان ملیار دۆلار، بۆ وەبەرهێنانی غاز لە كێڵگەی میران و كێڵگەی تۆپخانە-كوردەمیر لە پارێزگای سلێمانی واژۆكرد.