لەسەر ستەیجە گەشاوەکانی جیهان، بە پارەی فەرهودکراوی ئەم میلەتە و بە ناوی داهاتوو و گۆڕانکاریی جیهانی وتاری بریقەدار دەخوێننەوە؛ بەڵام لە ناوخۆدا، لەگەڵ سەرەتاییترین مافی مرۆڤ کە مووچە و نانە و ئازادیە خۆیان بگونجێنن.

تیۆرییەکانی سەرکردایەتی بۆ کەسێک ئاسانە کە لەسەر پشتی میلەتێکی برسی دانیشتبێت و ساڵی لێ کردبن بە ١٠ مانگی مووچە.

ئاخر جەنابی بەچکە فیرعەون ئەگەر ناوی باوکت و ئەو سامانی ڕەش و ڕووتەی میلەت نەبێت، کێ تۆ دەناسێت و لە کام شوێنی ئەم جیهانە دەمت ئەوەندە درێژ دەبێت؟ شەرمەزارییە بۆ دەسەڵاتێک، هەزاران کوڕ و کچی شەهید بێ نان و ئاو بن و کوڕی سەرۆک وەزیرانیکی بێ مووچە، لەسەر خوێنی ئەو شەهیدانە وڵات بە وڵات بگەڕێت و شانازی بە خۆیەوە بکات.

ئێوە لە جیاتی فێربوونی وتاری مۆدێرن، پێویستە فێری ئەوە بن کە سەردەمی کۆیلایەتی و حوکمی خێزانی لە جیهاندا کۆتایی هاتووە.

جیهان بە زانست و دادپەروەری دەگۆڕێت، نەک بە ناردنی کوڕی بەرپرسەکان بۆ لوتکە نێودەوڵەتییەکان لەسەر حیسابی گیرفانی فەقیر و هەژار.

گۆڕانکاریی ڕاستەقینە ئەوەیە کە نانی خەڵک بۆ بەرژەوەندیی بنەماڵە تەرخان نەکرێت.

پێویستمان بە فەلسەفەی ئێوە نییە، پێویستی بە گەڕاندنەوەی ئەو شکۆ و سامانە هەیە کە ساڵانێکە لێتان زەوت کردووین

سەدان  ووتاری لەبەرکراوی وەکو ئەمە ناتوانێت پەڵەی ڕەشی برسیکردنی گەل و زیندانیکردنی ئازادی بسرێتەوە.