گاڤ نیوز لەسەر بڵاوکردنەوەی پەیامێکی ئەدهەم بارزانی لەسەر پرسی کۆچبەران لەلایەن ئاسایشی پارتییەوە داخراوە

گاڤ نیوز؛ هەرچەندە میدیایەک بوو لەلایەن نێچرڤان بارزانی؛ جێگری سەرۆکی پارتی دیموکراتی کوردستان پشتیوانی دارایی دەکرا، بەڵام تاڕادەیەک هەڵوێستی جیاواز و دەنگی دەرەوەی پارتیشی لێوە دەبیسترا، بۆیە بەلای ئاسایشی پارتییەوە ئەمە قبوڵنەکراوبووە.

ڕۆژ لە دوای ڕۆژ لە دەڤەری بادینان ڕووبەری ئازادی ڕادەڕبڕین بەرتەسکتر دەکرێتەوە، دوای دەستگیرکردن و زیندانی کردنی دەیان ڕۆژنامەنووس و چالاکوانی ئەو دەڤەرە و ڕێگری کردن لە میدیا و ڕاگەیاندنی سەربەخۆ، ئێستا پارتی ڕێگەنادات لە میدیا سێبەرەکانی خۆشی هیچ دەنگێکی جیاواز بوونی هەبێت نەک دەنگی دژ.