کۆچبەرانی کورد بە کەیسی زیندانیانی بادینان وڵاتانی یەکێتی ئەوروپایان توشی شوک کردوە

لە ماوەی ئەم ھەفتەیەدادا کە لەگەڵ چەند بالیۆزخانەیەکی وڵاتانی یەکێتی ئەوروپا گفتۆگۆمان کردوە، ئاماژەیان بە بابەتی زیندانی بادینانیان کردوە کە لەلایەن کۆچبەرانی کوردەوە وەکو بەڵگەیەکی بڕواپێکراو ھاوتا لەگەڵ یاسا و پەیماننامە نێودەوڵەتیەکان پێشکەش دەکرێت، ئەمەش بۆ سومعەی ھەرێمی کوردستان خالێکی نەرێنی یە.

رێژەی ھەرە زۆری ئەو پەنابەرانەی لە ھەرێمی کوردستان بەرەو وڵاتانی یەکێتی ئەوروپا کۆچیان کردووە و گەیشتونەتە وڵاتی مەبەست، لە پێشکەشکردنی داوای مافی پەنابەرێتی و وەرگرتنی ئیقامە لە دایرەی کۆچبەرانی ئەو وڵاتانە وتویانە: ئێمە لەژێر دەستەڵاتی حکومەتی ھەرێمی کوردستان پارێزراو نین و ئازادی رادەربرین لە دۆخێکی مەترسیدار دایە و کەیسی زیندانیانی بادینان وەکو دوکیۆمەنتێک پێشکەشیان کردوە، زۆربەیان موفقەتیان وەرگرتوە. ئەمەش بە راپۆرت دراوە بە کۆنسوڵخانەو بالیۆزخانەکانیان لە ھەولێرو بەغداد.

ھەموو لایەنێک چ لەناوخۆ چ لە دەرەوە تێدەگەن بە سیناریۆ و بە ھێزی ئەمنی و دادگای حزبی ھاورێکانمان سزادراون، بویە پێم وایە دوسیەی زیندانیانی بادینان تا دێت گەورەتر دەبێت و شانازی بۆ ئێمە دەمێنێت و دەستەڵاتدارانی ھەرێم زیاتر پێی دەشکێن، لەمان کاتدا بۆ سومعەی ھەرێمەکەشمان باش نیە، بویە دەبێت کابینەی نۆیەم و بەدیاریکراوی پارتی دیموکراتی کوردستان واز لەم رق و تەحەداکردنە بێنێت لەگەڵ رۆژنامەنوس و چالاکوانە مەدەنیانەی بادینان.

ئەیھان سەعید - رۆژنامەنوس و نوێنەری زیندانیانی بادینان.

ناوچەی سەوزی بەغداد

١٥ی ١١ی ٢٠٢١