بە هەڵپەرکێی نەورۆز وەڵامی شەکر شکاندنی مەلاکە درایەوە.

مێژووی نەورۆز و شانازی و باوەربوون بە تایبەتمەندی کوردبونی ئەم جەژنە و بەرزی و باڵایی مانەوەی و بە سەربڵندی کورد و بەستنەوەی ئەم یادە بە نەتەوەی کورد و خۆچەسپاندنی وەکو نەریتێکی پیرۆز، خۆی لە خۆیدا لەسەر ئەرزی واقیع جێگەی خۆی گرتووە، سەرەرای چەندین راوبۆچونی جیاواز و هەڵوێستی هەمەچەشن، هەوڵی بەستنەوەی ئەو رۆژە بە یادی دیکە و تێکەڵکردنی بە بابەتە هەمەچۆرەکان لە لایەن وڵاتانی دەوروبەر و ئاڵوگۆرکردنی یادەکان و خاوەنەکانیان، بێ کاریگەر مایەوە و تا ئێستا نەورۆز بە خۆراگری وەکو جەژنێکی کورد و کوردستانی ماوەتەوە. ئێرە جێگەی باسکردنی لایەنە قووڵەکەی مێژوو نیە و زۆر کونوکەلەبەری تێدایە و سەرچاوەی هەمەجۆری کوردیمان لەبەردەستدا نیە بۆ یەکلاییکردنەوەی سەرجەم راوبۆچونە هەمەجۆرەکان کە هەر یەکە و بە پێی پاڵنەرێکی سیاسی ئایدیۆلۆجی فکری ئایینی خراوەتە بەرچاوە و بێگومان هەوڵی دوژمنانیش بەدەر نیە لە چەواشەکاری و ئاڵۆزی ئەم تاکە یادەی کە بەرەسەنایەتی بۆ کورد ماوەتەوە و تەنانەت هەڵوێستە دژ و خراپەکانی نەتەوەکانی سەردەست و وڵاتانی خاوەن مێژووی هاوبەش ئەوەندە زیاتر نەورۆز و کوردی بەیەکەوە بەستۆتەوە لە خودی کورد زیاتر ( لێرەدا قسە لەسەر خاوەندارێتی رەسەنی نەورۆز نیە بەقەد ئەوەی تێکئاڵانی ئەم جەژنە بە سیاسەت و ئایدیۆلۆجیا و ئایینەوە کراوە و هەموو چەواشەکاری و تێکچرژان و ئاڵاندنی ئایین و نەورۆز و بەرژەوەندیە هەمە رەنگەکان پێکەوە، خۆبەستنەوەی کوردی بەم جەژنە زیاتر کردۆتەوە).

بۆیە زۆر جار دوژمنان لاچەمکە تەنکەکە دەگرن بۆ دابرانی کورد لە باوەر و مێژووەکەی و هەوڵی لێکدابرانی ئەم میلەتە بە کۆڵەکە سەرەکیە زیندوەکانیەوە دەدەن، پەنا بردن بۆ بەکارهێنانی لاپەری لاواز و چەمکی تەنک و ئاشکرا لە نێو گوشارەی بیروهۆشی لاوازی کورد بۆتە کاری لەمێژینەی دوژمنان و جارجاریش خەلڕکی بیرهەژاری و نۆکەرنی هەمەجۆری ئایینی بێت یان سیاسی رۆڵی تایبەتی دوژمنانیان لەوبارەوە گێراوە.
پەنابردنە بەر پیرۆزیە ئایینی و مەزهەبیەکان بۆ لێدانی پیرۆزیە نەتەوەیی و ئیتنیەکان شتێکی تازە نیە و دوژمنان لەو بارەوە قسوریان نەکردووە و مێژووی کورد زۆر لاپەرەی لەم جۆەری تێدایە.
ئەمسالیش بینیمان زۆر کەسی لاپەر و غەرقی تاریکی و بێ قورسایی خۆیان کردە کەوا سوری بەرلەشکری دوژمنان و بەدڵی ئەوان قسەیانە کرد و جوڵانەوە. بەڵام لە رەوشێکی سیاسی و ئابووری لەم شێوەیەی تێداین، دەسترۆیشوو و کاربەدەست خۆی نەکردە خاوەنی و وەڵامێکی پر بە پیستی خۆی نەدرایەوە و نەکرایە عیبرەتێک بۆ ئەوەی جارێکی تر هیچ کەسێک نەوێرێت دەست بۆ پیرۆزیە نەتەوەییکان ببات و بە هەمان شێوەی پیرۆزیی ئایینی تەماشا بکریت. ئەمساڵ مەلایەکی لاپەری نەناسراوی کونوکقوشبنێک لەبیرکراو لە کۆیەی سەربەرز و لاپەرێکی ئەم کوردستانە بۆ مەرامگەلێک هاتە پێشەوە و شەکرێکی شکان و شەکری بن بنجێکی خانەقینیانەی خوارد.
وەک دەرکەوت کورد بە بێ ویستی خۆی زۆر جار رێرەوی مێژوو و لە رەوتی ژیان و بە بێ هیچ پلانێک وەڵامی ناحەزانی داوەتەوە و کاردانەوەی کەمەرشکێنی لەسەر ئەرزی واقیع خۆی فەرز کردووە.
بەڵێ ئەمساڵیش سەیران و گۆرانی و سرودی ئەم رۆژی ساڵی تازەی نەورۆز و هەڵپەرکێی خەڵکی هەرچوار پارچەی کوردستان کەمەری نۆکەرانی شکاند و دەمکوتی هزرلاوازانی کرد.