“دوابەدوای بڵاوکردنەوەی بابەتێک لە سەر بنەماڵەی بارزانی چەند جارێک هەڕەشەی لێکرابوو”

لە 12هەمین ساڵیادی تیرۆرکردنی رۆژنامەنوس سەردەشت عوسمان رێکخراوەکانی رۆژنامەوانی بێسنوور، پەیامنێرانی بێسنوور و کۆمیتەی بەرگری لە رۆژنامەنووسان راپۆرتێکیان لە ژێرناوی ” تیرۆركردنی سەردەشت عوسمان: پەردەهەڵدانەوە لەسەر بێبنەمایی گوتاری فەرمی” بڵاوکردەوە.

لە راپۆرتەکەدا هاتووە: ، ئەو لایەنە سیاسییەیە سەردەشت عوسمان چەند وتارێکی لەبارەوە نوسین پێدەچێت راستەوخۆ دەستیان لە رفاندن و کوشتنی رۆژنامەنووسەکەدا هەبووبێت و باس لەوەش دەکات، پێوستە وڵاتان سزا بەسەر ئەو کەسایەتیانەدا بسەپێنن كە رێگرییان كردووە لە ئەنجامدانی لێكۆڵینەوەی بێلایەن و شەفاف.

ئەوەش خراوەتەڕوو: ساڵی 2009 سەردەشت عوسمان بابەتێکی لەسەر گەندەڵی و خزمخزمێنە بڵاوکردەوە، كە تیایدا بەراوردێكی كردووە لەنێوان ژیانی پڕ خۆشگوزەرانی خێزانی مەسعود بارزانی و ژیانی پڕ نەهامەتی هاوڵاتیانی ئاسایی هەرێمەکەی دەکرد و دوای ماوەیەكی كورت، چەند جارێك هەڕەشەی كوشتنی لێكرابوو.

سەردەشت عوسمان رۆژنامەنووسی تەمەن 23 ساڵ بوو کە خوێندکاری قۆناغی چوار زانکۆ بوو و 12 ساڵ لەمەوبەر، لەبەردەم كۆلێژی ئادابی زانكۆی سەڵاحەدین رفێنرا و دواتر تەرمەكەی لە شەقامێكی شاری موسڵ دۆزرایەوە.

لێکۆڵینەوەکە باسی لەوەکردووە، “دژبەیەكیی لە چیرۆكە فەرمییەكە لەم رووانەوە بەدیدەكرێت: رفاندنی سەردەشت، گواستنەوەی سەردەشت (یان تەرمەكەی) لەهەولێرەوە بۆ موسڵ، راپۆرتی فەرمی توێكاری تەرمەكە، ئەو قسانەی كە گوایە ئەنجامدەرانی تاوانەكە سەر بە گروپی تیرۆریستی ئەنسارولئیسلام بوون، هەروەها ئەو هۆكار و پاڵنەرانەی خراونەتەڕوو سەبارەت بە تیرۆركردنەكە.”

ئەوەشی خستووەتەڕوو، “پێویستە دەسەڵاتدارانی كورد دەستبەجێ كۆتایی بە هەراسانكردن و تۆقاندن و هەڕەشەكردن بەرامبەر كەسوكاری سەردەشت عوسمان و هاوڕێكانی بهێنن.”

باسیان لەوەشکردووە، “پێویستە ئەوانەی پەیوەندی دیپلۆماسی و ئابوورییان هەیە لەگەڵ حكومەتی هەرێمی كوردستان فشاری بەردەوام بخەنە سەر دەسەڵاتدارانی هەرێم بۆ لێكۆڵینەوە لەبارەی هەڕەشەكردن و كوشتنی رۆژنامەنووسان، بەپێی ستانداردە نێودەوڵەتییەكان”.

داواش لە وڵاتان دەکەن سزا بەسەر ئەو لێپرسراو و دەسەڵاتدارانەی حكومەتی هەرێمی كوردستاندا بسەپێنن كە رێگرییان كردووە لە ئەنجامدانی لێكۆڵینەوەی خێرا، ورد، كاریگەر، بێلایەن و شەفاف دەربارەی ئەو تاوانانەی دژ بە رۆژنامەنووسان ئەنجامدراون.