TEVDA Press

سیبه‌را مۆساد له‌ هه‌ولێرێ

| Wednesday, 11.30.2022, 09:05 PM |



مژارا هه‌بوونا بنگه‌هێن ده‌زگاێ هه‌والگریا ئسرائیل یا ناڤدار ب (مۆساد) و لڤینێن وێ ل هه‌رێما كوردستانێ بویه‌ بابه‌ته‌كا گه‌رم یا سیاسی و دیبلۆماسی دناڤبه‌را هه‌ولێر و به‌غدا و ته‌هرانێ.
چاڤكانیا وێ ژی ژ ڤێ یه‌ كو ده‌مه‌كه ژلاێ‌ ئیرانێ ڤه‌ بانگه‌شا ڤێ دهیته‌ كرن كو ده‌زگاێ هه‌والگریا ئسرائیلێ ل هه‌رێمێ چالاكیێن ل دژی ته‌هرانێ پێك دئینیت و ڤێ چه‌ندێ دلگرانیێن ڤی وه‌لاتی گهاندیه‌ ئاستا هه‌ری بلند.
د ناڤه‌راستا ڤێ مه‌هێ دا ئسماعیل قائانی فه‌رماندێ سوپاێ قودس ب سه‌ره‌دانه‌كا نه‌راگهاندی گهه‌شته‌ به‌غدا و دگه‌ل له‌تیف ره‌شید سه‌رۆك كۆمار و محه‌مه‌د شه‌یاع سودانی سه‌رۆك وه‌زیرێ عێراقێ جڤیا.
پشتی ڤێ جڤینێ له‌تیف ره‌شید سه‌ره‌دانا هه‌ولێرێ ژی كریه‌، سه‌رۆك كۆماری ب ڤێ سه‌ره‌دانێ په‌یاما ئیرانێ گهاندیه‌ به‌رپرسێن هه‌رێما كوردستانێ كو بۆ ئه‌گه‌را وێ نێچیرڤان بارزانی سه‌رۆكێ هه‌رێمێ سه‌ره‌دانا به‌غدا بكه‌ت و دگه‌ل به‌رپرسێن عراقێ بجڤیت. پشتی وێ بۆ جارا دووه‌م دیسا د حه‌فتیا بۆری دا سه‌ره‌دانا به‌غدا كریه‌ و ل رۆژا سێشه‌مبی ل ڤێ حه‌فتیێ محه‌مه‌د شه‌یاع سودانی سه‌ره‌دانا ته‌هرانێ كر و ژلاێ سه‌رۆكوه‌زیر و رێبه‌رێ ئیرانێ ڤه‌ هاتیه‌ پێشوازی كرن كو ئه‌ڤ سه‌ره‌دان ژی ژلاێ ئیبراهیم ڕه‌ئیسی سه‌رۆكوه‌زیڕێ ئیرانێ ڤه‌ هاتبۆ داخوازكرن و ناڤه‌رۆكا گۆتوبێژان لسه‌ر ئه‌وله‌هیا دوو وه‌ڵاتان ژلاێ تیرۆرێ هاتیه‌ نرخاندن، سه‌ره‌رای ب ته‌ڤاهی ناڤه‌رۆكا گۆتوبێژان نه‌هاتیه‌ دیاركرن لێ بابه‌تێ سه‌ره‌كی جودایی ڤان دلگرانیێن ئیرانێ سه‌باره‌ت مژارا هه‌بوونا هه‌والگریا ئسرائیلێ ل هه‌ولێرێ نینه‌. حسێن عه‌بدلاهیان وه‌زیرێ ده‌رڤه‌ێ ئیرانێ ژی د ڤێ حه‌فتیێ دا د گۆتاره‌كا خوه‌دا به‌حسا هه‌بوونا چه‌كێن ئسرائیلی و ئه‌مریكی كربوو كو د چارچۆڤا سنورێ عیراقێ دا ل هه‌مبه‌ر ئیرانێ دهێنه‌ بكارئینان.
نوكه‌ مژارا سه‌ره‌كی ئه‌ڤه‌یه‌ كانی ده‌زگاێ هه‌والگریا ئیسرائیل ل هه‌رێمێ چدكه‌ت؟ ته‌هران بهانا ل هه‌ولێری دگریت یان به‌لگه‌ ل به‌ر ده‌ست هه‌نه‌ كو هه‌رێم پشتگیریا ئسرائیلێ دكه‌ت؟ هه‌لویستێ به‌غدا بۆ ڤێ چه‌ندێ دێ چ بیت؟ به‌ری به‌رسڤا ڤان پرسیارا دڤیت هنده‌ك زانیاریێن سه‌باره‌ت درست بونا ده‌زگاێ هه‌والگریا ئسرائیلێ بزانین!
مۆساد ناڤێ كورت كریێ "ده‌زگاێ هه‌والگری و ئۆپه‌راسیۆنا تایبه‌ت" سازیه‌كا ده‌رڤه‌ یا ئسرائیلێ یه‌ كو ل 1949\12\13 هاتیه‌ دامه‌زراندن و كارێ وێ كۆمكرنا زانیاریان و بڕێڤه‌برنا ئه‌ركێن گرێدای ب به‌رژه‌وه‌ندیێن وه‌ڵاتی ل ده‌رڤه‌ی سنورانه‌.
مۆساد ژ لاێ سه‌رۆك وه‌زیران دهێته‌ بڕێڤه‌برن و ڕێڤه‌به‌ریا وێ دهێته‌ ده‌ستنیشان كرن، به‌رپرسیاریا زۆرینه‌یا ڕێكه‌فتنێن نهێنی یێن ئسرائیلێ و ئه‌ركێ پاراستنا دۆسیایێن گرنگ و هاولاتیێن به‌رزه‌ یان ده‌سته‌سه‌ركری هه‌می ل وستوێ مۆسادێ یه‌.
زۆرینه‌یا كه‌یسێن تیرۆران ل ڕۆژهه‌لاتا ناڤین ده‌ستێ مۆسادێ تێدایه‌، لگۆری مۆسادێ كه‌سێن دهینه‌ تیرۆركرن ئه‌و كه‌س بوینه‌ یێن ل دژی حكومه‌تا ئیسرائیلێ بوونه‌. جودایی ڤێ سیخوریێ بسه‌ر هه‌می وه‌ڵاتاندا دكه‌ت چ دۆست یان چ دوژمن بن.
مۆساد هه‌رچه‌نده‌ موچه‌یێ وێ ژلاێ سوپاێ ڤه‌ دهیته‌ دابین كرن و هه‌می ئه‌ندامێن وێ پێشتر پله‌دارێن له‌شكه‌ری بوینه‌ لێ سازیه‌كا سڤیله‌ و وه‌ك به‌شه‌كێ سه‌ربازی ناهێته‌ دیتن و پۆستێن ئه‌ندامێن وێ ژی پله‌یێن كارمه‌ندینه‌ نه‌ك پله‌یا سه‌ربازی.
نوكه‌ دێ چینه‌ سه‌ر به‌رسڤا پرسان و دێ ب گۆتنا "ئه‌هید كۆهین" رۆژنامه‌ڤانێ نێزیكی به‌رپرسێن بلندێن ئسرائیل ده‌سپێ كه‌ین كو دبێژیت: هه‌كه‌ مۆسادێ ل هه‌ولێرێ باره‌گه‌هێن خوه‌ هه‌بانا چ جارا ئیرانێ جه‌ساره‌تا بومبه‌بارانكرنا وێ نه‌دبۆ، چونكی ئیسرائیل تاكه‌ هێزه‌ كو كه‌س جه‌ساره‌تا وێ ناكه‌ت ژلاێ هێز رووبه‌روویی وێ ببیت.
ئه‌ڤ گۆتنه‌ پشتی وان هێرشێن ئیرانێ بۆ ده‌ڤه‌رێن هه‌رێمێ هاتینه‌ گێران، بتایبه‌ت بۆ سه‌ر هه‌ولێرێ كو ل ده‌مێ خۆ دا گه‌له‌ك كارڤه‌دان دیف خوه‌ هێلان و ئیسرائیل ژی ب ره‌نگه‌كێ كۆمیدی ئه‌ڤ هێرشه‌ دخسته‌ ناڤا ده‌نگوباسێن خوه‌.
جودایی بۆچونێن ئیسرائیلیان به‌رپرسێن هه‌رێما كوردستانێ چ ل نوكه‌ و چ ل ده‌مێن به‌رێ ئه‌ڤ بانگه‌شه‌ ڕه‌د كرینه‌، لێ تشتێ كو ڤێ جارێ ژ ده‌مێن به‌رێ جودا دكه‌ت ئه‌ڤه‌یه‌ كو دیاره‌ ئیرانێ به‌لگه‌ لسه‌ر ڤێ چه‌ندێ ڕاده‌ستی به‌غدا كرینه‌.
نوكه‌ لسه‌ر گۆتوبێژێن داهاتی ڕاوستیایه‌ یێن ژ لایه‌كێ دناڤبه‌را هه‌ولێر و به‌غدا و ژلایه‌كێ دی دناڤبه‌را هه‌ولێر و ته‌هرانێ دێ هینه‌ ئه‌نجامدان كو ڕه‌نگه‌ ئه‌نجامه‌كا ئێكلاكه‌ر هه‌بیت بۆ ڤێ پڕسێ.
تەڤدا پرێس