گەورە ڕێکخراوی جیهانی تایبەت بە پارێزگاریکردن لە چالاکوانان، پێنج خاڵ ئاراستەی سەرانی هەرێمی کوردستان دەکات

دوای ئەوەی لەچەند رۆژی رابردوو، ڕەگەز کەمال پەیوەندی کرد بەڕێکخراوی جیهانی فرۆنتلاین دیفێندەرز، چاوپێککەوتن کرا لەگەڵ پارێزەرانی کەیسەکە، کەمێك لەمەوبەر ڕێکخراوەکە راپۆرتێكی لەسەر ئەم کەیسە بڵاوکردەوەو تیایدا سزادان و دادگاییکردنی ئەو چالاکوانانە بە ناڕەوا ناودەبات و رایدەگەیەنێت کە شێروان و هاوڕێکانی پەیوەندیان بەم تۆمەتانەوە نیە کە ئاراستەیان کراوە و بۆیە دەبێت دەستبەجێ ئازاد بکرێن.

ئەو خاڵانەی کە ڕێکخراوی فرۆنتلاین دیفیندەرز ئاراستەی بەرپرسانی هەرێمی کوردستانی کردووە:

یەکەم: دەستبەجێ شێروان شێروانی و هاوڕێکانی ئازادبکرێن و فرۆنتلاین دیفێندەرز باوەڕی وایە کە ئەو چالاکوانە بە ئامانج گیراوە بەهۆی کارەکانی رابردووی لەسەر پرسی مافەکانی مرۆڤ

دووەم: دڵنیایی بدرێت لە چۆنیەتی مامەڵەکردن لەگەڵ شێروان شێروانی لەناو زینداندا

سێهەم: لێپێچینەوە بکرێت لەو کەسانەی کە ئازار و ئەشكەنجەی شێروانیانداوە لەکاتی لێکۆڵینەوە

چوارەم: ڕێگە بدرێت کە پارێزەران و کەسوکاری شێروان ببیین و سەردانی بکەن.

پێنجەم: پێویستە دەستهەڵبگرن لە بە ئامانج گرتنی چالاکوانان بەگشتی لەهەرێمی کوردستان و ڕێگە بدەن کارەکانیان بەبێ ترس ئەنجام بدەن هەروەها هەموو ئەو ڕێگریانە هەلگرن کە دەخرێتە بەردەمیان تەنانەت گێچەڵی دادگاییکردن و ترساندنیان بە رووبەرووکردنەوەی یاسا.

ڕەگەز کەمال

هاوڕێکخەری ڕێکخراوی ١٧ی شوبات بۆ مافەکانی مرۆڤ

٢٥ی شوباتی ٢٠٢١