دانا مەنمی، ڕۆژنامەنوس لە لایەن دەزگای بەدناوی پاراستنی پارتیەوە پەلامار دەدرێت

دانا مەنمی، ڕۆژنامەنوس پاش پەلاماردانی لە لایەن چەند کەسێکەوە ڕایگەیاند: "ئەمڕۆ شەممە 8ی ئابی 2020، كاتژمێر 10:25 خولەکی سەرلەبەیانی، دەزگای پاراستنی بەدناوی پارتی لەڕێگەی پێنج بەكرێگیراوەوە بە دەمانچە لە پشتی نەخۆشخانەی فاروق  پەلاماریان دام."

هەروەها وەك ئەوەی ڕایگەیاند: "پێش چەند رۆژێك لەمەوبەر دەزگای پاراستنی پارتی لەڕێگەی چەند دۆستێكەوە پەیوەندییان پێوە كردم  و داوایان لێكردم كە ڕەخنە لە پارتی و بنەماڵەی بەرزانی و مەلا مستەفا نەگرم، داوایان  كردبوو  سەردانی دەزگا بەدناوەكەی پاراستن بكەم لە سلێمانی و پلەو پۆست و وەزیفەكانم بۆ بگەڕێننەوە، بەڵام من لای خۆمەوە داواكەیانم ڕەتكردەوە و پێم گوتن ئەو دەزگایە بۆنی دێت و بۆگەنی كردووە و داماڵدراوە لە بەھا و ئەخلاق و موراڵ ."  

دانا مەنمی دەشڵێت: " پارتی ھەرچەندە گەورەو بەھێز بێت، بارتەقای  گەورەی و بەھێزییەكە  لە دەنگی ئازادو قەڵەمی  بوێر و ھەقبێژی دەترسێت، ترس پاڵنەری ھەڵسوكەوتەكانی پارتییە، پارتی دوژمنی ھەرەسەرەكی مرۆڤی بەئاگاو كۆمەڵگای زیندووە حیزبێكی سەركوتكەرو چەپێنەری  ئازادییە ."  

 ئەو ڕۆژنامەنوسە ڕونیشیکردووەتەوە: "ئەم جۆرە كارانە كە مرۆڤی جەبان  بە بڕیاری دەزگایەكی بەدناو پێی ھەستاون ورەو ئیرادەی ئێمە ناڕوخێنێت، چونكە لە جەوھەردا بونەوەری ترساوو بێئیرادە نین ،بە ئاشكرا دەپەیڤین و دەنوسین و لەتاریكیدا نانوسین  بەردەوام دەبین بۆ خزمەتكردنی نەتەوەو نیشتیمان "  

دانا مەنمی ئاماژەی بەوەشکردووە: "لە كۆتایی دا سوپاسی یەك بە یەكی دكتۆرە بەڕێزەكان لە بەشی شكاوی وتیشك لە نەخۆشخانەی شۆڕش دەكەم  كە زۆر لە خۆبووردوانە و دڵسۆزانە و ماندوونەناسانە  ئەركی سەرشانی خۆیان بەجێگەیاند خودا مەحفوزیان بكات ."  

وەکو ماڵپەڕی تەڤدا پرێس پرسیار ئاراستەی سەرشۆڕانی یەکێتی بەتایبەتی لاهوڕ و بەچکەکانی تاڵەبانی دەکەین کە ئایا بۆچی لە ناوچەی ژێر دەسەڵاتیاندا لە ئاستی دەسدرێژیەکانی پارتی ئاوا بێدەنگ و سەرکزن؟ دیارە دەیانەوێت ئەوە بسەلمێنن کە لە گەندەڵی و دزی تاوان و دەسدرێژیەکانیشدا شەریکی ستراتیژی یەکترن؟