تیرۆر دیاردەیەكی ئالۆزە و کردەیەکی تاریک و مەترسیدارو نەریتێکی قێزەون و ترسناکە و ناتوانین تەنھا لە گۆشەنیگایەكەوە پێناسەی بكەین ، هەریەک لە زانستەکانی (سۆسیۆڵۆژی، ئەنسرۆپۆلۆژی، سیاسی، دەروونشیكاری) تەفسیری جیاوازیان هەیە بۆ تیرۆر ، تیرۆریست پێویستی بە بازاڕێکی شێواوە بۆ ئەوەی كەشێكی پڕلە ترس و تۆقاندن دروست دەكات، بەلای تیرۆریستەكانەوە قوربانیەکان گرنگ نین ئەوەی کە گرنگە مەسیجی كارە تیرۆریستیەکەیە ، هەربۆیە لە تیرۆرکردنی (هاوکار جاف) ئەفسەرەکەی دژە تیرۆری یەکێتی لە هەولێر ئەم ڕاستیانە دەبین کە هەم دۆخی کوردستان و هەولێر بەتایبەتی شێواوەو هەمیش کردەکە بێباکانەو بەرنامە بۆ داڕێژراوە کە هیچ سۆز و بەزەییەکی نییە بۆ ژن و منداڵی ناو ئوتۆمبێلەکە چونکە ئامانجەکە مەسیجەکەیە ئیتر گرنگ نییە قوربانیەکان کێن ؟! تیرۆر وەک دیاردە و تاوان زیاتر گرێدراوی سیاسەتە ، زۆرترین حاڵەتەکانی تیرۆر لە سەر ئاستی جیهان تیرۆری سیاسییە ، ‌مه‌به‌ستیش له‌م جۆره‌ی‌ تیرۆرە ئه‌و تیرۆره‌یه‌ كه‌ گروپێکی لەناو حیزبێکدا یان هیزێکی سیاسی یانیش دەوڵەتیک پێی هەڵدەستێت و ئەنجامی ئەدات ، مەسەلەن لە عێراقدا هەریەک لە (مەلیک فەیسەڵی دووەم ١٩٥٨ و عبدالکریم قاسم ١٩٦٣ و عبدالسلام عارف ١٩٦٦ )تیرۆر کران ، ئەمانە دەچنە خانەی تیرۆری سیاسییەوە ، کوردیش بە درێژایی مێژوو خەباتەکەی بێبەش نەبووە لە تیرۆری سیاسی کە هەم هێزە سیاسییەکان لەناو خۆیاندا و دژ بە یەک ئەنجامیان داوە هەمیش رژێمە یەک لە دوای یەکەکان دژ بە کورد و شۆڕشەکەی پەنای بۆ بردووە . ناچمەسەر پاکتاوکردنی سیاسی و جەستەییی نەیارانی فیکر و سیاسەت لەنێو ماڵی حیزبەکاندا لە خەباتی چەکداری و شۆڕشی شاخ ،کە بەدرێژایی ساڵانی خەباتی چەکداریی حیزبەکانی کوردستان سەرقاڵی پاکتاوکردنی سیاسی و جەستەییی نەیارانی ئیدۆلۆگی و نەیارانی سیاسیی بوون ،خۆم لەقەرەی باسکردنی شەڕی ناوخۆی نێوان (پارتی و یەکێتی) یش نادەم کە خوێناویترین و پڕ ئازارترین شەڕە بەڵام لە دوای‌ پرۆسەی ئازادی لەعێراق ٢٠٠٣ وە تیرۆری‌ سیاسی‌ یه‌كێك بووه‌ له‌و دیمه‌نانه‌ی‌ كه‌ ناوبەناو له‌گۆڕه‌پانی‌ سیاسی‌دا ڕوویداوە و بەشێکی ئەو تیرۆرە سیاسییانە پارتی و یەکێتی بەئامانجی پاککردنەوەی حساباتی ناوخۆی خۆیان پەنایان بۆ تیرۆرکردنی کەسایەتیە سیاسی و هەواڵگری و سەربازییەکان بردووە . پارتی و یەکێتی بۆ پاککردنەوەی حساباتی نێوخۆی خۆیان و دژ بەیەک کات و ناکات نازانن و شیرازەی ئاسایشی کۆمەڵایەتی و سیاسییان تێکداوە ، چەک زمانی گفتوگۆی ئەم دوو هێزەیە لەناو خۆیان و دژ بە هێزەکانی تر ، هەربۆیە بەردەوام گوێبیستی دەنگی فیشەک بۆ کوشتنێکی تری سیاسی دەبین ، ژینگەیەکی پڕ لە توندوتیژی و دڕندەییان بۆ فەراهەم بووە کە هیچ بەهایەکیان بۆ ژیانکردن نەهێشتووەتەوە و تا دێت توندوتیژی و تاوانی خێزانی و کۆمەڵایەتی و سیاسی زیاتر دەبێت کە ئەمە خاڵێکی مەترسیدارە و دەبێ توخم پێکهاتەی یەکێتی و پارتی بناسین بزانین کە ئەم دوو هێزە ئەمین نین و ئەمانیشیان نییە بۆ کوشتنی نەیارەکانیان !