لە رێگای ھەڵاتن و دەربەدەری لە ژێر بۆمبی فرۆکە و دەنگی چەك ھەلسامەوە و لەبەر بۆنی باروت یەکەم ھەناسەی ژیانم ھەلکێشا لەناو تەپ و تۆز چاوەکانم کردنەوەو

لەبەھاری سالی ١٩٩١ لەدایك بووم سالی سەرھەلدان وسالی ئازادی و سالی

بەزاندنی دکتاتورەکان بۆیە راھاتوم بەئازادی بژیم و گوتاری سەپاندن و دکتاتورانە ڕەت بکەمەوە زۆر ناگەرێمە دواوە ھەر لێرەوە دەست پێ دەکەم:-

دوای ھاتنی پەڕۆ باڵەکانم ئارەزوی فرینم کرد لەناو ھێلانە ویستم لەسەر داروگۆل و شاخ و بەردی ئەم ووڵاتە دا بفرم ویستم جیاواز لە بالندەکانی دی ئاواز بلورینم ویستم بەرزتر لەوان بفرم ھەتا بگەمە پەلە ھەورەکان و لەسەر ئەوانیشدا بفرم ویستم لەگەل با سەما بکەم ولەگەل باران دا عەشق، ویستم گۆل و پەپولە بەیەك بگەیێنم ودەنوکی داڵەکان بکەمەوە قەلەم بۆ نوسینەوەی سازانی نێوان دڕندەو بێ زیانەکان ویستم چیتر نینوك و کەڵبە  بە خوێن سورکراوەکان نەبینم ویستم شەڕ لەباوەشی ئاشتیدا بخەوێنم.

سەدەھا ویست و ئارەزوی دیکە لەناو دڵمدا ھەلدەقوڵان بەڵام ئێستا لەلایەن ڕاوچیەکانی ئازادییەوە بەندکراوم ئەگەر ئێوە بزانن ئەم قەفەسە چەندە تەنگ و ناخۆشە ھەمووتان ھەوڵی شکاندنی دەدەن بەڵام من نەھەولی شکاندن و ھەڵاتنیش تێدا دەدەم دەزانن بۆ؟

چونکە ھەر ھەبونی قەفەس خۆی لەخۆی دا ستەمە بۆیە نە شکاندن و نە ھەڵاتن تێدا چارەسەر نیە بەلکو ئازادبوون لە عەقلیەتی سەپاندن و زیندانکرن و بە کوێلە کردنی خەلك چارەسەر بۆیە ھەر چەند ئەم قەفەسە تەنگ و ناخۆشیش بێت،مادەم شوێنی کرانەوەی باڵەکانم ھەیە دەبێ بفرم و بەردەوام بین لە ئاواز لوراندن ھەتا ئەوانیش فێری ئازادی و یەکتر قبۆلکردن و رێزگرتن لە رای جیاوازببن.

بۆیە تکاتان لێدەکەم وەڵات جێ مەھێلن بێ دەنگیش مەبن بەرامبەر راوچیەکانی ئازادی و دزەکانی نەوت و ئاوی ووەڵاتەکەمان وە بەردەوام بن لە فڕین ھەتا ئەو چەکانەی لەدەستیان ببن بە گۆل و زیندانەکانیش ببن بە میمبەری ئازادی