پێشێلکارییەکانی مافی مرۆڤ و دەستگیرکردن و ترساندنی خەڵکی ناڕازی کوردستان گەیێندرایە ڕێکخراوە نێودەوڵەتیەکان

دوێنێ ٢١/٩/٢٠٢٠ ڕاسپێردراوی لۆبی ڕێکخراوە کوردستانییەکانی تایبەت بە مافەکانی مرۆڤ هیوا خۆشناو لەگەڵ بەرپرسی بیرۆی بروکسلی ڕێکخراوی "ئینتەرناسیۆنال ئالیانس" AIDL و سەرپەرشتیاری ڕێکخراوی مافی مرۆڤ و کەمینەکان "پۆست ڤێرسا" و کارمەندی دادگای بروکسل ئاندی ڤەرمۆوت کۆبوەوە و پێشێلکارییەکانی مافی مرۆڤ، زیندانیە نایاساییەکانی هەرێمی کوردستانی عێراق/باشوور تاووتوێ کران.

لە کۆبونەوەکەدا هیوا خۆشناو سکاڵانامەیەکی ئاراستەی هەردو ڕێکخراو کرد کە ئەندامن لە نەتەوە یەکگرتوەکان و ناو و ناونیشانی سەرجەم گیراوەکانی بادینان، لایەنگرانی تەڤگەری ئازادی و سەرجەم چالاکوانەکان، یاساناسان و مامۆستایانی هەرێمی پێدان کە ماوەیەکە بە شێوەیەکی نایاسایی لەلایەن پارتی دیموکراتی کوردستان دەستگیرکراون و هەنێکیشیان شوێنبزر کراون و مافی بەرگریکردن لە خۆیان نیە.

بەڕێز ڤەرمۆوت لە دیدارەکەدا ئەو ڕەفتارانەی پارتی دیموکراتی کوردستان و حکومەتی هەرێمی کوردستانی شەرمەزار کردن و نیگەرانی خۆی لە هەڵسوکەوتەکانی حکومەتی کوردستانی عێراق دەربڕی کە چەندین مانگە نەیانتوانیوە موچەی فەرمانبەران بدەن، کاتێک خەڵک داوای مافەکانیان دەکەن، لە ژێر ناوی جیاجیادا زیندانیان دەکەن و دەیانترسێنن.

ناوبراو لە درێژەی گفتوگۆکاندا سەرسوڕمانی خۆی لەبەرانبەر کردار و سیاسەتەکانی حکومەتی هەرێم بە گشتی و پارتی دیموکراتی کوردستان بەتایبەتی دەربڕی و بەم شێوەیە دوا:

"ئێمە لە نەتەوەیەکگرتوەکان و رێکخراوە جیهانیەکان تا دەگاتە پارلمانی ئەوروپا، شەوو ڕۆژ دەخەینە سەریەک بۆ ئەوەی دژی پێشێلکارییەکانی سیاسەتە داگیرکارییەکانی دەوڵەتی تورکیا بوەستینەوە لە ڕۆژئاوا، باکوور و باشووری کوردستان، ڕای گشتی جیهانی گەیشتۆتە ئەو بڕوایە کە گەلی کورد قوربانییەکی زۆر و بوێرییەکی لەڕادەبەدەری دژی تێرۆریزمی داعش/ئەل قاعیدە و دەوڵەتە دکتاتۆرییەکانی ناوچەکە بەتایبەتی تورکیا داوە، دەبێ پاداشتی بدرێتەوە. لێرەدا زۆر سەیرە حزبێکی هەرە کۆنی کوردی لەسەر خاکی خۆیدا هاوکاری داگیرکەران دەکات و ناڕازییەکان کە دێنە سەرشەقامەکان بۆ دەرکردنی سوپای داگیرکەری تورکیا دەخاتە زیندان".

ئێمە داوادەکەین هەرچی زوە داوای لێبوردن لە زیندانییەکان بکرێت و دەست لەو سیاسەتە کۆنەی ڕژێمە دکتاتۆرییەکان هەڵگرن، ئەوە هەرگیز شایەستەی قوربانی و قارەمانی گەلی کورد نیە. هەروەها ناوبراو بەڵێنیدا لە ئاییندەیەکی زۆر نزیکدا لەو بارەیەوە سەرجەم پێشێلکارییەکان بگەیەننە یەکە بەیەکەی ئەندامانی پارلمانی ئەوروپا و لە نەتەوەیەکگرتوەکانیش دانیشتنێک لەو بارەیەوە سازبکەن.