ئه‌ڤ هه‌ر چار كه‌سه‌ دبه‌رێ دا دگه‌ل لیستا هه‌ڤپه‌یمانی یا د. به‌رهه‌م سالح بوون، و پشتی ناڤبری چویه‌ف دناڤ رێزێن ئێكه‌تیێ دا، ڤان هه‌ر چار كه‌سایه‌تیان ده‌ست ژ هه‌ڤپه‌یمانیێ ڤه‌كێشایه‌ و سه‌ربخۆ ماینه‌

هه‌ر چار كه‌سایه‌تی (سلێمان هاریكی، سلێمان موسی، مه‌سعود شنگالی، وجه‌مال خه‌لیل سندی)، دوو ل ئاكرێ هاتینه‌ ره‌ڤاندن و ئێك ل دهوكێ و ئێك ژی ل زاخۆ هاتیه‌ ره‌ڤاندن ژباڵ ئاسایشێن پارتی ل ده‌ڤه‌رێن وان، وهه‌می ژی راده‌ست رێڤه‌به‌راتیا ئاسایشا پارێزگه‌ها دهوكێ كرینه‌.

ل گۆڕه‌ی دیڤداچوونا TEVDAPress ئه‌گه‌رێ گرتنا ڤان چار كه‌سایه‌تیان بو دروستكرنا رێكخستیه‌كا سیاسی بوویه‌، كو لسه‌ر ئاستێ به‌هدینان دهه‌یاما چه‌ند مه‌هه‌كێن بوری دا چه‌ندین جڤین و كومبین بو ڤێ مه‌به‌ستێ ئه‌نجامداینه‌.

ته‌ڤدار پرێس زانیه‌ كۆ ئه‌ڤه‌ ده‌مێ 40 روژه‌ ئه‌ڤ گروپه‌ كه‌تینه‌ بنچاڤدێریا هویرا ده‌زگه‌هێ پاراستنا پارتی و گومان هه‌یه‌ هه‌ڤاله‌كێ وان (... ناڤ پاراستیه‌ لجه‌م TEVDAPress) ژده‌رڤه‌ی ڤان چار كه‌سا سیخوری بو پاراستنێ كربیت و ئه‌ڤ توڕه‌ ئاشكه‌را كربیت، نه‌خاسمه‌ كو دبه‌ری دا خۆفروتنبی پارتی دهه‌وا هه‌لبژارتناندا.

دوو ئه‌گه‌ر لسه‌ر دروستكرنا رێكخستیا سیاسی و نهێنیا ڤێ گروپێ هه‌بووینه‌؛ یا ئێكێ، ئه‌وه‌ كو په‌یوه‌ندی ب لیستا كازمی ڤه‌كربیت كو لبه‌ره‌ دسالا بهێت دا به‌شدار ببن دهه‌لبژارتناندا.
و ئه‌گه‌را دوویێ ژی، گومان هه‌یه‌ كو ڤێ گروپێ په‌یوه‌ندیه‌كا نهێنی دگه‌ل په‌كه‌كێ هه‌بن ولبه‌ر بوویه‌ لیسته‌كێ چێكه‌ن ب هه‌ڤكاریا په‌كه‌كێ.

ل گۆڕه‌ی TEVDAPress پاراستنا پارتی چه‌ند كه‌سه‌كێن نێزیكی ڤانه‌ دڤان چه‌ند روژاندا بانگی باره‌گایێن پاراستنێ كرینه‌ و پسیارێن نێزیك ڤێ بزاڤێ لێكرینه‌.