بە پێی ئەو هەواڵانەی لە دەڤەری بارزانەوە بە تەڤدا پرێس گەیشتووە، بەرواری ٢٤ی ئەم مانگە، بە بێ ئاگاداری دانیشتوانی ئاسایی هەردو گوندی بارزان و ڕێزان و ئالیکە، لە ناکاو شەش نەخۆشهەڵگر (ئیسعاف) لە شاری هەولێرەوە گەیشتونەتە ئەو گوندانە.

هەر یەکێك لە نەخۆشهەڵگرەکان پزیشك و تیمی برینپێچی و کەرەستەی پێویستیان   بۆ ڤاکسینی کۆرانا بە شێوەیەکی بەبەرنامە و ڕێکخراو پێبوە.

ئەم شەش نەخۆشهەڵگرە و تیمەکانیان سەردانی ماڵ و خانەوادەی شێخانی بنەماڵەی بارزانیان کردووە و ڤاکسینی دژە کۆرۆنایان لێداون.

یەکێك لە نەخۆشهەڵگرەکان بەتایبەتی چۆتە گوندی ئالیکە کە نیهاد برای مەسعود بارزانی نیشتەجێەتی و ڤاکسینی لە بنەماڵەی نیهاد و شێخانی بارزانی ئەو گوندە داوە.

بێگومان ئەم کارە پاش ئەنجامدانی ڤاکسیلێدان لە تەواوی بەرپرسانی بنەماڵەی بارزان لە سەری ڕەش ئەنجام دراوە.

لە کاتێکدا هاوڵاتیان ناچارن خۆیان سەردانی خەستەخانەکان بکەن و لە ڕیزەکاندا بووەستن، خێزانەکان و بنەماڵەی دەسەڵاتدارانی بارزانی تەواوی خزمەتگوزاریەکانیان بۆ دەچێتە ماڵەکانیانەوە و لە شێوازێکی "بنەماڵەی پادشاکان" ی وڵاتانی نیمچە دورگەی عەرەبی  ڕەفتاریان لەگەڵدا دەکرێت.

بارزانیەکان لە دو توێژی سەرەکی پێکدێن، شێخان و مسکێنەکان. مسکێنەکان ئەگەرچی هەندێکیان  بەهۆی  ئەوەی سەر بە خێڵی بارزانن لە هەندێك بواردا سودمەندن، بەڵام لە لایەن شێخانی بارزانەوە کە بنەماڵەی دەسەڵاتداری بارزانیەکانن هەمیشە بە جیاوز ڕەفتاریان لەگەڵدا دەکرێت و لە شێوازی کاستەکانی وڵاتی هیند بە چاوێکی نزمترەوە تێیان دەڕوانرێت. مامەڵەی کۆمەڵایەتی و ژن وژنخوازی لە نێوان ئەم دو  توێژەی شێخان و مسکێنەکانی خێڵی بارزان، مۆرك و شێوازێکی قەدەغە و سنورشکاندنی پێوەیە. مامەڵەی ئەم دو کاستە تەنها لە بازنەی خزمەتکار و خزمەتکراودایە لە بوارە جیاوازەکاندا.

گەیشتنی ئەو نەخۆشهەڵگرانە بۆ دێیەکانی بارزان و ڕێزان و ئالیکە، لە لایەن بارزانیە مسکێنەکانی ئەو گوندانە و ناوچەکە چاوەڕوان نەکراو بووە. تەنانەت نەخۆشخانەی بلەوبارزان و بەرپرسانی بێئاگایی خۆیان لەو شەش نەخۆشهەڵگرە و چۆنێتی پلانی ئەو ڤاکسینکردنەی شێخانی بارزان  پێشانداوە.