عەواد بەندەر ھاوڕێ و ھاوخەباتی صەدام حوسێنی بوو لەھەموو قۆناغە جیاجیاکانی خەباتی نھێنی و ئەودەمەی نائیب بوو تا دوایی بووە سەرۆکی بێ ڕکابەری عێراق.

ھەر یەک لە براو خزم و ھاوڕێ نزیکەکانی دۆسیەی گرنگی دەوڵەت و حیزبیان وەرگرت.

عەواد بەندەریش دۆسیەی مەحکەمە سەورەی عێراقی وەرگرت. لەدوای مەحکەمەی مەھداوی ئامۆزای عەبدولکەریم قاسمی سەرۆک کۆمار کەبەئاشکرا لەپەخشی ڕاستەو خۆی تەلەڤزیۆن و ڕادیۆ پەخش دەکرا.

مەحکەمە سەورەی بەعس زۆربەی جار بەنھێنی و بە ئامادەبوونی پارێزەری بەعسی کە زۆرجاران خۆیان دەبوونە ھۆکاری سزادانی موەکیلەکانیان لە بەندیەکان.

تا کار گەیشتە سزادانی بەکۆمەڵی بەندیە سزادراوەکانی بەسێدارە و لە ھەشتایەکان تا ئەو ڕادەی یەک منەصەی ئیعدام کردن کەم بێ و پێڕانەگەن بەندیەکانی پێ لەسێدارە بدەن کردییانە دوو قەنارە.

دەڵێن جارێکیان ڕێزێک بەندی ڕێز کرابوون ژمارەیان زۆر بوو. عەواد بەندەر گۆتبووی ھەتا کراس سپیەکە سێدارە و لەویوەش تەبریە. جەلادەکان بۆیان یەکلا نەدەکرایەوە کراس سپیەکە لە سێدارە دەن یان تەبریەی کەن.

بەھەموو شێوەیەک کوردستان لە فۆرمی دەوڵەت داری دەبوا سزای زۆر توندی ھەر کەسێکی خایەن و نیشتیمان فرۆش و گەندەڵ و دز و ناپاک بدا. نەک سزادانی بەکۆمەڵی ھۆشیار ترین توێژی کۆمەڵگا.

دەبوا بۆ ھەر کەیسێکی دادگایی کردنی مەدەنی دادوەر و داواکاری گشتی و دادگا تەواو سەر بەخۆ بوونایە دوور بوونایە لە کەسانی حیزبی فەرمانڕەوا. تا موسداقیەت بە دەسەڵاتی دادوەری لەق نەبوایە.

ھەولێر، ٢٠٢١/٢/١٦