ئاشكه‌را بۆ كو فه‌رمانبه‌رێن تۆمه‌تبار ب دزینا 2 ملیار و 800 ملیۆن دیناران ل دهۆكێ قوربانینه‌

ئارمانجا به‌ڵاڤكرنا بابه‌تێ گه‌نده‌لیا ژێر ناڤێ فه‌رمانبه‌ره‌كێ ل تاقیگه‌ها بیناسازی ل دهۆكێ و چه‌ند كارمه‌نێدن دی ب ره‌نگه‌كێ به‌رفره‌ھ د كه‌نالێن سه‌ر ب پارتی ڤه‌ مه‌ره‌م ژێ ئه‌وه‌ ژبۆ ڕكلاما حكومه‌تا مه‌سرور بارزانی ل به‌ر ده‌رازینكا ئاماده‌كاریێن هلبژارتنان ژێر به‌رچه‌سپا چاكسازیێ بكێشنه‌ به‌ر چاڤێ ڕایا گشتی، لێ لگۆر زانیاریێن ڕاست و دروست كو ژلاێ چاڤكانیێن گرێدای ڤێ دۆسیێ بده‌ست ته‌ڤداپرێس كه‌ڤتین بابه‌ته‌ك گه‌له‌ك قڕێژتر و فه‌زیحه‌یه‌كا مه‌زنتر ل پشت ڤێ دۆسیێ هه‌یه‌ كو ته‌ڤدا پرێس دێ د گه‌ل خوینه‌رێن خوه‌ پارڤه‌ كه‌ت.

ڕاستیا بابه‌تی چیه‌؟!

ژمێریار عسمه‌ت به‌رواری ژدایك بۆیێ 1957 كو به‌ری 9 مه‌هان ل دهۆكێ هاتیه‌ ده‌سته‌سه‌ركرن هه‌ر ژ ساڵا 1978 ێ ل ڤی پێشه‌ی دا ده‌ست بكار بۆیه‌ د قۆناغا نێزیكی 30 ساڵان كاركرنا وی ل ڕێڤه‌به‌ریا تاقیگه‌ها بیناسازی ل دهۆكێ بۆ تا ساڵا 2020ێ وه‌كه‌ كه‌سه‌كێ ده‌سپاك و كاردروست هاتیه‌ سه‌لماندن. لێ چه‌وا بۆیه‌ كو ده‌ستێ وی تێكه‌لی دزی و گه‌نده‌لیان بۆیه‌؟
لگۆری به‌لاڤۆكێن پارتی ئه‌ڤ گه‌نده‌لیه‌ د قۆناغا 8 ساڵاندا هاتیه‌ بڕێڤه‌ برن، ڕاستیا بابه‌تی ئه‌ڤه‌یه‌ كو ئه‌و پێشترهه‌رچه‌نده‌ هاتبۆ خانه‌نشین كرن لێ ب ڕێیا "عه‌مه‌ر ئۆره‌یی" و "دیار به‌حری به‌رواری" دیسا دهێته‌ ڤه‌گه‌ڕاندن بۆ سه‌ر كارێ وی، ئانكۆ ئه‌ڤ كارێ گه‌نده‌لیێ ب ئاگه‌هداریا ڤان دوو به‌رپرسێن بلند یێن پارتی هاتیه‌ ئه‌نجامدان، ئه‌و ژی ژبه‌ر ڤێ كو ڤان دوو كه‌سا دزانی ئه‌ڤ عسمه‌ته‌ كه‌سه‌كێ جهێ باوه‌ریێ بۆیه‌ بۆ وان كو گه‌نده‌لیێن خۆ لژێر ده‌ستێ وی كو كه‌سه‌كێ خودان ئه‌زمونه‌كا دویر و درێژه‌ و ده‌ستپاكه‌ بڕێڤه‌ ببه‌ن، له‌ورا ژ لاێ وانڤه‌ ب ڕه‌نگه‌كێ ده‌رڤه‌ی یاسایێ دهێته‌ ڤه‌گه‌ڕاندن بۆ درێژه‌پێدانا گه‌نده‌لیێن به‌رێ كو پشكا هه‌ری زێده‌ یا وان دزین و گه‌نده‌لیان ژلاێ عه‌مه‌ر ئۆره‌یی و دیار به‌حری ڤه‌ ده‌ست بسه‌ردا دهاته‌ دانان.
ئه‌ڤ 2 ملیار و 800 ملیۆن دیاره‌ بێ گومان 90% دچۆ به‌ریكا ڤان دوو كه‌سێن كو به‌رپرسێن بالایێن دناڤ پارتیدا نه‌ و هه‌كه‌ لێكۆلینه‌ك ڕاست دگه‌ل تۆمه‌تبارێن ڤێ گه‌نده‌لیێ بهێنه‌ كرن گومان تێدا نینه‌ دێ هێته‌ سه‌لماندن كو ئه‌ڤ كه‌سه‌ بۆ ڤی كاریه‌ هاتیه‌ نه‌چاركرن و هه‌رچی تۆمه‌تباره‌كێ دیه‌ هه‌می قۆربانیێن دزیێن ده‌ستێ به‌رپرسێن باڵایێن پارتینه‌. 

لگۆری زانیاریێن ژ لاێ چاڤكانیێن باوه‌رپێكری ده‌ست ته‌ڤداپرێس كه‌ڤتینه‌ ئه‌ڤ عسمه‌ت به‌رواریه‌ ژلاێ ده‌زگایێن ئه‌منی یێن پارتی لژێر چاڤدێریا عه‌مه‌ر ئۆره‌یی ب ره‌نگه‌كێ دژوار دهێته‌ ئه‌شكه‌نجه‌ كرن و گه‌فێن ماڵ و خێزانی لێ دهێنه‌ خوارن بۆ كو ڤان گه‌نده‌لیان لسه‌ر عه‌مه‌ر ئۆره‌یی به‌رپرسێ به‌رێ یێ لقا 18 وبه‌رپرسێ نهۆ یێ له‌قا 8 و دیار به‌حری ڕێڤه‌به‌رێ باژێڕڤانیا دهۆكێ یێ به‌رێ ئه‌شكه‌ره‌ نه‌كه‌ت.

لێ پڕسا ژ هه‌میا گرنگتر ئه‌ڤه‌یه‌ كو ئه‌ڤ كریاره‌ بڕه‌نگه‌كێ به‌رفره‌ھ د به‌ڵاڤۆكێن پارتی دا بتایبه‌ت كه‌نالێ رووداو و 24 ئه‌ڤ مژاره‌ دهێته‌ ڤه‌كرن و دكه‌ڤیته‌ به‌ر چاڤێ ڕایا گشتی كو ئه‌گه‌را وی ژی ئه‌ڤه‌یه‌ وه‌ك بابه‌ته‌كێ چاكسازی مژارێ بكێشنه‌ رویێ جڤاكا هه‌رێمێ و ڕایا گشتی و قڕێژێن ده‌ستهه‌لاتێ ب فیداكرنا هنده‌ك قوربانیان تافیل بكه‌ن.

وه‌ك د كه‌نالێ رووداو ژی دا هاتیه‌ ئاماژه‌پێدان ئه‌ڤ كه‌سێن هاتینه‌ تۆمه‌تبار كرن ب ڤێ گه‌نده‌لیێ بێ كو ئاگه‌هداری ڤێ گه‌نده‌لیێ ببن ژلایێ به‌رپرسێن بلندڤه‌ ڕاسپارده‌ی ڤی كاری هاتینه‌ كرن و وان ئاگه‌ھ ژ ڤێ گه‌نده‌لیێ نه‌بۆیه‌، ژ وان قوربانیان ژی 4 ژێ ژنن، هه‌ر دیسا ژی وه‌ك د كه‌نالا ناڤبریدا ژی ئاماژه‌ پێ هاتیه‌ دان قه‌ت نه‌پێكانه‌ بێ هه‌بوونا ده‌سته‌كێ بلند هه‌ر ژ ساڵا 2014ێ بۆ تا نهۆ كو ئه‌ڤان گه‌نده‌لیان ده‌وام كریه‌ چ ڕێڤه‌به‌رك یان به‌رپرسه‌كێ چاڤدێر ئاگه‌ھ ژ ڤێ گه‌نده‌لیا هنده‌ مه‌زن و به‌رچاڤ نه‌بیت، لێ ئه‌ڤه‌ دڤێت ژلاێ ده‌زگایه‌كێ تایبه‌ت بهێته‌ لێپڕسین كرن و دیار به‌حری و عه‌مه‌ر ئۆره‌یی ب ڕێیا یاسا و دادگه‌هه‌كا سه‌ربه‌خۆ و جهێ باوه‌ریێ بهیته‌ لێپڕسین كرن نه‌ك ب یاسا و دادگه‌هه‌كێ كو سه‌روه‌ریا وێ د ده‌ستێ مافیایێن ژ میناكا به‌ده‌ل به‌ندی و عه‌لی ته‌ته‌ر و ئازاد گه‌رماڤی و عه‌مه‌ر ئۆره‌یی دایه‌، وی ده‌می دێ عسمه‌ت به‌رواری بێ ترس و دودلی ژلاێ ده‌زگایه‌كێ یاسایی ڕاستیان ئاشكه‌را كه‌ت و ڤان دوو به‌رپرسێن پارتی و هه‌م ژی یاسا و ده‌زگایێن ئه‌منی یێن پارتی و حكومه‌تا مه‌سرور بارزانی هه‌می كه‌ڤنه‌ ژێر لێپرسین و تاوانا ڤێ دزی و گه‌نده‌لیێ و دویر نینه‌ گه‌له‌ك تاوانێت قڕێژ یێن دی ژی ئه‌شكه‌ره‌ ببن.

لگۆری پێزانینان دێ ل 28ێ ڤێ مه‌هێ ئێكه‌م ڕوونشتنا دادگه‌هێ لسه‌ر ڤێ كه‌یسێ هێته‌ ڕێڤه‌برن كو پێدڤیه‌ لسه‌ر جڤاكا گشتی یا هه‌رێمێ ڤان فه‌رمانبه‌رێن كو بۆینه‌ قوربانیێ ده‌ستێ به‌رپرس و ڕێڤه‌به‌رێن سه‌ره‌كی یێن پارتیا كو وه‌كه‌ تاپۆیا لسه‌ر ناڤێ بنه‌مالا بارزانی دهێته‌ دیتن بتنێ نه‌هێلن و هه‌م ژی داخازێ ژ یاسایه‌كا سه‌ربخۆ بكه‌ن دا كۆ تاوانبارێن سه‌ره‌كی ئه‌شكه‌ره‌ بكه‌ن و سزا بده‌ن.