میللەت

سیروان بارزانی و رەحمە دەستیان كردوە بە گرتنی راوێژكاری نێودەوڵەتی بۆ روبەڕوبونەوەی ئەو تۆمەتانەی لەلایەن پشكدارە سەرەكییەكانی كۆڕەكەوە ئاراستەیان كراوە.

هەردوو گەورە كۆمپانیای گەورەی ئەجیلادەی كوەیتی و ئۆرەنجی فەرەنسی تۆمەتی ئیتخلاس كردن و بردنی پارەی كۆمپانیای كۆڕەكیان خستۆتە سەر ئەستۆی سیروان بارزانی و هاوبەشە لوبنانیەكەی بەناوی رایمۆند رەحمە.

ماڵپەڕێكی نزیك لە هەواڵگری فەرەنسا بڵاوی كردۆتەوە كە سیروان بارزانی بازرگانی ناسراوی كوردستان و برازای مەسعود بارزانی سەرۆكی پێشووی هەرێم بەم دواییە سەردانی كۆمپانیایەكی نێودەوڵەتیی بەریتانی كردووە بۆ ئەوەی راوێژی بدەنێ و پشتیوانی بكەن كە ناوبانگی لەوەزیاتر نەزڕێت.

ماوەی دوو ساڵە سیروان بارزانی كێشەی هەیە لەگەڵ هاوبەشەكانی لەناو بەڕێوەبەرایەتی كۆمپانیای كۆڕەك تیلیكۆم. هەریەك لە كۆمپانیای عێراق تیلیكۆم و ئۆرەنجی فەرەنسی و ئەلجیلادەی كوەیتی سكاڵایان لەسەر سیروان بارزانی تۆمار كردووە بە تۆمەتی ئەوەی سیروان بارزانی ئیتخلاسی كردووە لەناو كۆمپانیای كۆڕەك و دەستی بۆ ئەو پارەیە بردووە كە موڵكی هەموو شەریكەكانە و بە جیا و بە نهێنی لەگەڵ كۆمپانیای نزیك لە خۆی دا شەراكەتی كردووە و بزنسی لەگەڵ كردوون و قازانجەكەی لە ئۆرەنج و ئەلجیلادە شاردۆتەوە.

هەر سێ كۆمپانیاكە سیروان بارزانییان تۆمەتبار كردووە كە سەدان ملیۆن دۆلاری خواردوون.